DAILYKARABAKH
Hər şey ədalət üçün!
 

İlham Əliyev: Azərbaycanın təhlükəsizliyi Ermənistanın təcavüzü nəticəsində ciddi təhdidlərlə üz-üzə qalıb

Müstəqilliyini bərpa etdiyi ilk gündən Azərbaycanın təhlükəsizliyi Ermənistanın təcavüzü nəticəsində ciddi təhdidlərlə üz-üzə qalıb.

Dailykarabakh-ın Trend-ə istinadən verdiyi məlumata görə, bunu Prezident İlham Əliyev Bakıda “Asiyanın Qəlbi” - İstanbul Prosesi çərçivəsində “Güclü Asiyanın Qəlbi regionu naminə təhlükəsizlik və bağlılıq” mövzusunda VII nazirlər konfransında çıxışı zamanı deyib.

Dövlətimizin başçısı qeyd edib: "Öz ərazisinin 1/5-nin işğal olunmasından əziyyət çəkən və yüz minlərlə vətəndaşı məcburi yerdəyişməyə məruz qalan bir ölkə kimi Azərbaycan sülhün, təhlükəsizliyin və sabitliyin dəyərini çox yaxşı anlayır. 20 ildən artıqdır ki, Ermənistan Azərbaycan torpaqlarının 20 faizini - Dağlıq Qarabağ regionunu və ətraf 7 rayonu işğal altında saxlayır".

İlham Əliyev bildirib ki, münaqişə nəticəsində bir milyondan artıq azərbaycanlı qaçqın və məcburi köçkün vəziyyətinə düşüb:

"Ermənistan azərbaycanlılara qarşı Ermənistanda, Azərbaycanın Dağlıq Qarabağ regionunda və 7 ətraf rayonunda etnik təmizləmə siyasəti həyata keçirib. İşğal olunmuş ərazilərdəki vəziyyət beynəlxalq ictimaiyyətə məlumdur. ATƏT işğal olunmuş ərazilərə iki dəfə faktaraşdırıcı missiya göndərib və hesabatlar göstərir ki, bu ərazilərdə vandalizm əməlləri törədilib. Bizim şəhərlərimiz, kəndlərimiz, məzarlıqlarımız, məscidlərimiz Ermənistan tərəfindən dağıdılıb".

Prezident xatırladıb ki, 1993-cü ildə BMT Təhlükəsizlik Şurası Ermənistan qoşunlarının Azərbaycan ərazilərindən dərhal və qeyd-şərtsiz çıxarılması barədə dörd qətnamə qəbul edib: "Status-kvo qəbuledilməzdir. Bu, yalnız Azərbaycan tərəfindən deyil, ATƏT-in Minsk qrupunun həmsədr ölkələri tərəfindən də bəyan edilir. Bu ölkələrin prezidentləri dəfələrlə bəyan ediblər ki, status-kvo dəyişdirilməlidir və qəbuledilməzdir".

Dövlət başçısı vurğulayıb ki, Ermənistan-Azərbaycan, Dağlıq Qarabağ münaqişəsi beynəlxalq hüququn norma və prinsipləri, BMT Təhlükəsizlik Şurasının müvafiq qətnamələri əsasında həll edilməli və Azərbaycanın ərazi bütövlüyü tam bərpa olunmalıdır.

XƏBƏRİ PAYLAŞ